Sautján fyrrverandi kærustur

Breski Idol-dómarinn Simon Cowell á von á „góðu“ í fimmtugsafmæli sínu sem haldið verður núna um helgina. Ein fyrrum unnusta Cowells, Jackie St Claire, stendur fyrir veislunni nú, jafnvel þótt kappinn eigi ekki afmæli fyrr en 7. október.

„Kampavínið mun flæða og miðað við gestalistann mun Simon þurfa á því að halda. 17 fyrrverandi kærustur hans verða nefnilega á staðnum. Slíkt væri örugglega hin mesta martröð fyrir flesta karlmenn, en ef einhver höndlar það er það Simon,“ sagði vinur Cowells í viðtali við breska dagblaðið Daily Mirror.