Kossinn endurtekinn

Einn frægasti koss allra tíma, koss sem hjúkrunarkonan Edith Shanin fékk frá ungum sjóliða á Times Square í New York, þann 14. ágúst 1945 var endurtekinn í gær. Aftur var það Shanin sem var kysst en sjóliðinn var annar enda ekki vitað hver var með Shanin á myndinni sem birtist í Life tímaritinu 1945.

Shanin sem er komin á tíræðisaldur hafði að vísu ákveðnar hugmyndir um frá hverjum hún vildi þiggja koss í þetta skiptið en því miður var Tony Curtis vant við látinn og varð hún að láta sér nægja koss fra stríðshetju úr Víetnamstríðinu.

Það kannast eflaust flestir sem komnir eru til vits og ára við myndina sem ljósmyndarinn Alfred Eisenstaedt tók af kossinum en tilefnið var fögnuður við lok seinni heimstyrjaldarinnar.Hann tók myndina eins og áður sagði 14. ágúst 1945. Hún birtist síðan í Life tímaritinu viku síðar en tímaritið var tileinkað stríðslokum þá vikuna og nefndist umfjöllunin Sigur (Victory).

• Blogga um frétt