Jóhannes snýr aftur með útvarpsþátt í anda Kompáss

„Ég var ritstjóri Kompáss og við framleiddum yfir hundrað þætti. Þar vorum við með fullt af málum sem væri áhugavert að halda áfram með,“ segir Jóhannes Kr. Kristjánsson sem fer af stað með nýja útvarpsþætti nú í september, en þeir verða á útvarpsstöðinni Kananum sem Einar Bárðarson hleypir af stokkunum á þriðjudaginn.

Aðspurður segir Jóhannes að þættirnir verði að nokkru leyti í anda Kompáss og hann muni því halda stífri rannsóknarblaðamennsku áfram.

„En auðvitað verður þetta með mínu sniði, ég er náttúrlega ekki með samstarfsfólk mitt með mér í þessu, heldur er bara einn. Þannig að efnisvalið verður mjög fjölbreytt, ég verð bæði með harðar fréttaskýringar og svo líka viðtöl við áhugavert fólk.“