Ramsey í rugli

Stjörnukokkurinn Gordon Ramsey er þekktur fyrir að segja álit sitt umbúðalaust þegar kemur að rekstri veitingahúsa og matargerð. Í nýjum dómi virta veitingahúsarýnisins „Harden's London Restaurants“ eru veitingastaðir Ramseys hinsvegar sagðir fáránlega dýrir og gæði matarins heldur slök.

Orðstír helsta veitingastaðar Ramseys, Chelsea, er sagður hafa hrapað hraðar en verðbréfamarkaðurinn á liðnu ári og æsingurinn í matseðlinum þykir jafn „fjarlægur og maðurinn sjálfur.“ Sjö rétta hefðarmáltíð á Chelsea veitingahúsinu kostar um 120 pund á mann án víns en gæði máltíðarinnar eru talin hafa dvínað verulega.

Árið hefur verið erfitt fyrir stjörnukokkinn en ímynd hans skaðaðist töluvert vegna ásakana um framhjáhald auk þess sem fyrirtæki hans var sakað um að bera fram tilbúinn mat. Í síðasta mánuði kom í ljós að hagnaður af veitingahúsaveldi Ramseys hafði hrunið um nærri 90% og varð hann því að setja fjármagn úr eigin vasa í reksturinn.

• 1 blogg um fréttina

Bloggað um fréttina

• Jenný Anna Baldursdóttir: Þetta er ég sem tala niður til ykkar úr 101