Coldplay og Satriani sættast

Breska hjómsveitin Coldplay og bandaríski gítarleikarinn Joe Satriani hafa náð að sættast, en Satriani höfðaði mál á hendur hljómsveitinni í fyrra. Hann sakaði hana um að hafa notað í leyfisleysi hluta úr lagi eftir sig sem kallast „If I Could Fly“, og kom út árið 2004, í smellnum „Viva La Vida“.

Bandaríska tónlistartímaritið Billboard segir að Satriani hafi látið málið falla niður og þá verði Coldplay ekki að játa á sig neina sök í málinu.

Talsmaður Coldplay sagði í samtali við breska ríkisútvarpið að hljómsveitin muni ekki tjá sig um málið.

Talsmaður Satriani hefur staðfest að samkomulag hafi náðst á milli deiluaðila eftir að dómsskjöl höfðu verið birt á bandarísku lögfræðisíðunni justia.com.

Ekki liggur fyrir hvort Coldplay þurfi að greiða Satriani bætur vegna málsins.

• 1 blogg um fréttina

Bloggað um fréttina

• Gísli Foster Hjartarson: Coldplay og Satriani