Winehouse aftur í vínið

Söngkonan Amy Winehouse ber nafn með rentu, en líkami hennar er sem fullt hús af víni, svona alla jafna. Winehouse hefur dvalið langdvölum á Bahamaeyjum til að forðast það að stíga í vænginn við Bakkus en um leið og hún stígur fæti aftur inn í heimaborg sína, London, fer dansinn að duna á nýjan leik.

Þannig fór hún á fyllerí á fimmtudagskvöldið ásamt Tyler James, fyrrverandi unnusta en núverandi vini. Til allrar hamingju endaði kvöldið ekki með ósköpum og Winehouse komst nálægt einhverju sem mætti kalla hófdrykkju. Batnandi fólki er best að lifa og Winehouse eldist greinilega vel... líkt og gott vín.