Flestir sáu Algjöran Sveppa

Íslenska barnamyndin Algjör Sveppi og leitin að Villa byrjar mjög vel sína fyrstu helgi í sýningu. Myndin var langmest sótta myndin í íslenskum bíóhúsum um helgina og átti fjórðu stærstu opnunina það sem af er árinu, á eftir Harry Potter, Karlar sem hata konur og Hangover. Augljóst að ungviðið hefur beðið spennt eftir að fá eitthvað íslenskt fyrir sig á hvíta tjaldið.

Enda sagði Sæbjörn Valdimarsson gagnrýnandi um myndina í Morgunblaðinu síðasta sunnudag: „Það er mikil kúnst að halda athygli barnanna óskiptri í barnatímum (eins og raun ber vitni), hvað þá í langri bíómynd. Galdurinn er sá að Sveppi og félagar bera fulla virðingu fyrir áhorfendunum sínum og vita greinilega hvað þeir vilja, það gerir gæfumuninn.“

Skemmtilegt fólk

Í öðru sæti kemur myndin sem var efst í síðustu viku, rómantíska gamanmyndin The Ugly Truth.

Funny People var frumsýnd fyrir helgi og nær að skila þriðju hæstu tekjunum í kassann í þetta skiptið. Myndin mun vera hin besta skemmtun og fær fjórar stjörnur hjá gagnrýnanda Morgunblaðsins á annarri síðu hér í blaðinu í dag.

Næst á Bíólistanum koma þrjár myndir sem hafa verið tvær til tíu vikur í sýningu; District 9, Up og Karlar sem hata konur.

Megaskvísan Megan Fox leikur svo aðalhlutverkið í myndinni í sjöunda sæti, Jennifer´s Body. Myndin var frumsýnd fyrir helgi. Í henni segir frá menntaskólastúlku sem verður fyrir því óláni að djöfullinn sjálfur tekur sér bólfestu í líkama hennar. Myndin er sögð frábær og gamansöm hrollvekjuspennumynd frá handritshöfundi Juno, Diablo Cody.