Tangó á heimsminjaskrá UNESCO

Menningarmálastofnun Sameinuðu þjóðanna, UNESCO, lýsti því yfir í dag að dansinn tangó hefði verið settur á heimsminjalista stofnunarinar. Þetta var ákveðið á fundi, sem nú stendur yfir í Abu Dhabi við Persaflóa.

Tangó á rætur sínar að rekja Búenos Aires  í Argentínu og Montevideo í Úrúgvæ og var fyrst dansaður þar í byrjun 20. aldar. Þessar höfuðborgir lögðu til við UNECSO að dansinn yrði settur á heimslista yfir menningarminjar.  Alls liggja 76 tillögur fyrir fundinum í Abu Dhabi og var þessi sú fyrsta sem var samþykkt.

Tangó tengist Rio de la Plata sem er á landamærum ríkjanna tveggja. Þar settust fátækir landnemar frá Evrópu og afkomendur fyrrum þræla frá Afríku að undir lok 19. aldar. Menning og siðir þessara hópa blandaðist og þróaðist og á endanum varð til sérstök menning.

Mörg tangólög voru samin og flutt við undirleik lítillar harmóníku, bandoneon, og textarnir voru á sérstakri mállísku, sem nefnd var lunfardo.  Þeir fjalla yfirleitt um ástarsorg og heimþrá, um fjölskyldutengsl og líf í úthverfum borga. 

• 1 blogg um fréttina

Bloggað um fréttina

• Gunnar Th. Gunnarsson: Er ekki í lagi.. ? Glíman á heimsminjaskrá !