Stjörnur og hefðarfólk í Kaupmannahöfn

Ríka og fræga fólkið er nú statt í Kaupmannahöfn þar sem opnunarhátíð ársþings Alþjóðaólympíunefndarinnar (IOC) fór fram í Óperuhúsinu í kvöld. Michelle Obama, forsetafrú Bandaríkjanna, kom síðust, en fram kemur á vefnum spn.dk að hún hafi verið átta mínútum of sein.

Fram kemur að öryggisgæslan á svæðinu hafi verið gríðarlega mikil, enda mikið af hefðarfólki viðstatt.

Danska konungsfjölskyldan tók á móti gestunum, en auk Michelle Obama voru spjallþáttastjórnandinn Oprah Winfrey, knattspyrnumaðurinn Pelé, Luiz Inácio Lula da Silva, forseti Brasilíu, Jóhann Karl og Sofia, konungshjóns Spánar og José Luis Rodríguez Zapatero, forsætisráðherra Spánar á meðal erlendra gesta.

Alþjóðaólympíunefndin mun á laugardag taka ákvörðun um hvaða borg fær að halda sumarólympíuleikana árið 2016. Fjórar borgir eru eftir í þeirri baráttu: Chicago, Madrid, Tókýó og Rio de Janiero. Er það ástæðan fyrir því að fyrrgreindir þjóðhöfðingjar eru staddir í Kaupmannahöfn.

Von er á Barack Obama, Bandaríkjaforseta, í stutta heimsókn til borgarinnar í fyrramálið en hann ætlar að ávarða Alþjóðaólympíunefndina og reyna að sannfæra hana um að best sé að ólympíuleikarnir verði í Chicago. Michelle kona hans er formaður sendinefndar Chicago á fundinum.

Gestirnir hafa að vonum vakið athygli í Kaupmannahöfn síðustu daga og varð meðal annars uppi fótur og fit þegar Oprah Winfrey fór í gönguferð á Strikinu, kíkti í búðir og smakkaði danskt vínarbrauð.