Gerðu viðvart vegna heimsóknar Polanski

Yfirvöld í Sviss segjast hafa brugðist rétt við með því að gera bandarískum stjórnvöldum viðvart vegna heimsóknar leikstjórans Romans Polanski til Zurich.

AP-fréttastofan greinir frá því að þessi ábending hafi orðið til þess að hinn 76 ára gamli Polanski var handtekinn í síðasta mánuði vegna áratuga gamallar nauðgunarákæru. Fréttastofan segir að þetta komi fram í tölvupóstum sem hún hafi séð.

Folco Galli, talsmaður dómsmálaráðuneytisins í Sviss, segir í samtali við AP að svissnesk yfirvöld hafi spurt bandaríska embættismenn hvort handtökuskipun frá árinu 2005 væri enn í gildi. Svör hafi borist og því hafi yfirvöld í Sviss orðið að bregðast við.

Polanski var handtekinn í Zurich en hann kom til landsins frá Frakklandi til að veita verðlaunum viðtöku á kvikmyndahátíð í borginni.

Hann hefur verið eftirlýstur í Bandaríkjunum fyrir að hafa nauðgað barni og flúið Bandaríkin 1978.

• 1 blogg um fréttina

Bloggað um fréttina

• Hrannar Baldursson: Hver hefur samúð með Roman Polanski?