REM og Pearl Jam gegn Guantanamo

Rokksveitirnar Pearl Jam og REM hafa tekið höndum saman með fleiri tónlistarmönnum sem styðja Barack Obama, forseta Bandaríkjanna, í því að loka Guantanamo-fangabúðum Bandaríkjahers á Kúbu.

Auk tónlistarmannanna styðja fyrrum herforingjar herferðina, sem kallast The National Campaign to Close Guantanamo. Henni var hleypt af stokkunum í fyrradag. 

Margir listamannanna eru afar ósáttir við að herinn hafi notað þeirra tónlist við yfirheyrslur í fangabúðunum.

George Little, talsmaður bandarísku leyniþjónustunnar (CIA), segir að tónlistin hafi aðeins verið notuð í öryggisskyni, en ekki til að refsa föngum. 

„Undanfarin 30 ár höfum við stutt friðar- og mannréttindamál. Að fá þær fréttir að tónlist vina okkar hafi verið notuð sem pyntingartól, án þeirra samþykki eða vitundar, er hræðilegt. Þetta er and-amerískt, punktur,“ segir í yfirlýsingu frá REM.

Meðal annarra listamanna sem styðja málefnið eru Jackson Browne, Steve Earle, Roseanne Cash, Billy Bragg, Bonnie Raitt og rokkararnir í Rage Against The Machine.

Þjóðskjalasafn Bandaríkjanna í Washington hefur farið fram á það fyrir hönd listamannanna að fá í hendur leyniskýrslur, þar sem fjallað er um það hvernig hávær tónlist sé notuð við yfirheyrslur.

Eddie Vedder og félagar í Pearl Jam leggja sín lóð á vogarskálarnar. Reuters

• 1 blogg um fréttina

Bloggað um fréttina

• Gísli Foster Hjartarson: Ánægður með þá