Hræódýr í framleiðslu en malar gull

Góð markaðssetning og mikið umtal skilaði framleiðendum hryllingsmyndarinnar Paranormal Activity 22 milljónum Bandaríkjadala í kassann um helgina en frá því myndin var frumsýnd nýverið hefur hún halað inn 62 milljónum dala sem er dágóð fjárhæð fyrir mynd sem kostaði 11 þúsund dali í framleiðslu.

Paranormal Activity var vinsælasta kvikmyndin vestanhafs um helgina öllum að óvörum en myndin hefur einungis verið sýnd í Norður-Ameríku hingað til.

Má segja að leikstjóri myndarinnar, Oren Peli, hafi þar með fetað í fótspor framleiðanda The Blair Witch Project sem sló heldur betur í gegn árið 1999.

Líkt og Blair Witch þá þykir Paranormal einföld og áhrifarík ef marka má skrif AFP fréttastofunnar. En það er ekki eins og myndin sé ný af nálinni þó hún hafi ekki ratað fyrr í kvikmyndahús fyrr en nú en tökur fóru fram árið 2006. 

• 2 blogg um fréttina

Bloggað um fréttina

• Salvör Kristjana Gissurardóttir: Stop Motion Animation er listform nútímans
• Jón Pétur Líndal: Úff.