Gunnlaugur nálgast 5.000 kílómetra á árinu

Gunnlaugur Júlíusson hagfræðingur stefnir að því að hlaupa 5.000 kílómetra á árinu. Í fyrra hljóp hann 4.800 km og árið 2007 hljóp hann rétt rúmlega 3.000 km.

„Álagið hefur aukist verulega. Engu að síður er þetta miklu léttara en áður. Það þakka ég fyrst og fremst mataræðinu,“ segir Gunnlaugur á bloggsíðu sinni.

Í sumar hljóp Gunnlaugur frá Reykjavík norður til Akureyrar til styrktar Grensásdeild Landspítalans.

„Að hlaupa 5.000 kílómetra er með því mesta sem menn ná á einu ári,“ segir Gunnlaugur, en hann er með ýmis spennandi verkefni í deiglunni og kveðst því munu ná settu takmarki fljótlega.