Forseti Serbíu sektaður fyrir fagnaðarlæti

Dómstóll í Serbíu hefur sektað Boris Tadic, forseta landsins um 400 evrur, jafnvirði 74 þúsund króna, fyrir að opna kampavínsflösku í viðhafnarstúku á knattspyrnuleikvangi í Belgrad til að fagna því að serbneska landsliðið komst í úrslitakeppni heimsmeistaramótsins í Suður-Afríku á næsta ári.

Tadic játaði brot sitt greiðlega en hann gladdist mjög eins og aðrir áhorfendur sem sáu Serba sigra Rúmena 5:0 í október og tryggja sér þar með farseðlana til Suður-Afríku.

Íþróttamálaráðherra Serbíu og formaður knattspyrnusambands landsins voru líka sektaðir.

Bannað er með lögum að hafa áfengi um hönd á íþróttaleikvöngum í Serbíu. Er það gert til að koma í veg fyrir ofbeldisverk í tengslum við íþróttaviðburði.  

Tadic bar fyrir dómi, að hann hefði ekki vitað um þetta bann og því sagðist hann axla ábyrgð á broti sínu. 

• 1 blogg um fréttina

Bloggað um fréttina

• Gísli Foster Hjartarson: Meiri festa! - Snilld