Bíógestum fjölgar á ný

Heildaraðsókn að kvikmyndasýningum á landinu öllu árið 2008 nam laust innan við 1,6 milljón gestum, eða um 7%  fleiri en árið áður. Hagstofan segir að það jafngildi því að hver landsmaður hafi fimm sinnum sótt kvikmyndasýningar á árinu og hefur aðsókn að kvikmyndum ekki verið meiri síðan árið 2002.

Kvikmyndahúsagestum á höfuðborgarsvæðinu fjölgaði um 8% milli áranna 2008 og 2007 en lítilsháttar samdráttur varð í aðsókn utan höfuðborgarsvæðisins. Andvirði seldra aðgöngumiða á landinu öllu nam ríflega 1270 milljónum króna á síðasta ári.

81% kvikmyndanna bandarískar

Hagstofan segir, að 166 leiknar kvikmyndir í fullri lengd hafi verið teknar til sýkninga á árinu. Af þeim voru 134 bandarískar, eða 81% og 13 breskar, eða 8%.  Aðeins ein norræn kvikmynd var frumsýnd í kvikmyndahúsum hér á árinu auk sjö íslenskra. Fleiri íslenskar langar leiknar myndir hafa ekki verið frumsýndar síðan árið 2002, en það ár voru frumsýndar sjö íslenskrar kvikmyndir.

Markaðshlutdeild íslenskra kvikmynda var 8% miðað við aðsókn, en 10,5% miðað við andvirði greiddra aðgöngumiða. Segir Hagstofan, að um sé að ræða talsverða aukningu í markaðshlutdeild íslenskra kvikmynda og sýninga þeirra frá næstliðnum árum. Hlutdeild bandarískra kvikmynda var langsamlega mest á liðnu ári hvort heldur er miðað við aðsókn og tekjur af miðasölu, eða ríflega 80%.

Á síðasta ári voru starfrækt 18 almenn kvikmyndahús með 41 sýningarsali á 13 stöðum á landinu. Sætaframboð var 6446 og sýningar á viku að meðaltali 819. Kvikmyndahúsum utan höfuðborgarsvæðis fækkaði um tvö frá fyrra ári. 

• 1 blogg um fréttina

Bloggað um fréttina

• Njörður Helgason: Ljómandi góð afþreying.