R.A.T.M. náði fyrsta sæti

Aðdáendur rokksveitarinnar Rage Against the Machine get nú hoppað hæð sína í loft upp af kæti því smellur þeirra „Killing in the Name Of“ frá árinu 1992 náði efsta sæti á breska lagalistanum sem Bretar kalla Jólalistann. Sveitin bar því sigurorð af X Factor-söngvaranum Joe McElderry.

Söngvari sveitarinnar, Zack De La Rocha, fagnaði þessu ákaft fyrr í kvöld á bresku útvarpsstöðinni Radio 1. Fyrsta sætinu var náð með átaki á Facebook, netverjar keyptu lagið á netinu í þúsundavís sem skilaði þessum árangri. De La Rocha sagði þetta sigur yfir gerilsneyddu poppi. Sveitin var búin að lofa ókeypis tónleikum á Bretlandi næði lagið fyrsta sæti og ætlar að standa við það. 

• 2 blogg um fréttina

Bloggað um fréttina

• Gísli Foster Hjartarson: Athyglisvert jólalag
• Jens Guð: Risa kjaftshögg á X-factor