Kominn út úr skápnum

Leikarinn Sean Hayes, sem er hvað þekktastur fyrir að leika hinn ofurhýra Jack í sjónvarpsþáttunum Will & Grace, er kominn út úr skápnum og prýðir nýjustu forsíðu tímaritsins The Advocate.

Það hefur lengi verið altalað að Hayes væri samkynhneigður en hann hefur hingað til neitað að tjá sig um kynhneigð sína og segir enn að hún sé í raun algjört aukaatriði. Ekki eru allir á sama máli og Hayes og hafa margir í bloggheimum látið í veðri vaka að hann ætti að skammast sín fyrir að hafa ekki komið út fyrr og tekið þátt í baráttunni fyrir réttindum samkynhneigðra.