Ertu með klámefni?

Ferðamenn þurfa nú að svara nýrri spurningu þegar þeir koma á flugvelli í Ástralíu, auk spurninga um hvort þeir séu með vopn, ólögleg lyf eða fíkniefni: Ertu með klámefni?

Ástralska tollgæslan kveðst hafa tekið þessa spurningu upp í september síðastliðnum við eftirlit á flugvöllum. Markmiðið sé að koma í veg fyrir smygl á barnaklámi til landsins.

Ástralski kynlífsflokkurinn hefur þó mótmælt spurningunni og lýsir henni sem „hryllilegri innrás í einkalíf fólks“ þar sem starfsmenn tollgæslunnar geti nú skoðað fartölvur og farsíma ferðamanna til að ganga úr skugga um hvort þeir séu með klámefni. „Ef fólk hefur tekið myndir af sér og makanum að njótast á framandi stað eða fara í bað, þá þurfa þeir að svara spurningunni játandi, annars brjóta þeir lögin,“ sagði formaður flokksins, Fiona Patten.

Patten bætti við að ferðamenn þyrftu að gera grein fyrir öllu klámefni í fórum þeirra, jafnvel efni sem væri ekki bannað í Ástralíu, og starfsmenn tollgæslunnar gætu krafist þess að fá að skoða það. „Er sanngjarnt að tollgæslumenn gramsi í farangri ferðamanna, taki upp löglegt klámtímarit  fyrir framan börnin þeirra eða tengdamóður?“ spurði hún.

• 1 blogg um fréttina

Bloggað um fréttina

• Axel Jóhann Hallgrímsson: Hverju skila svona spurningar?