Vilja banna Tinna í Kongó

Lögfræðingar útgefanda bóka um Tinna líkja lögbannsbeiðni á bókina Tinni í Kongó við bókabrennur. Hefur maður frá Kongó sem býr í Brussel farið fram á að lögbann verði sett á teiknimyndasöguna vegna kynþáttafordóma sem komi fram gagnvart Afríkubúum í bókinni um fréttamanninn knáa í Kongó.

Alain Berenboom, lögfræðingur Moulinsart, útgefanda verka Hergé, segist ekki geta sætt sig við kynþáttafordóma ekkert frekar en hann sætti sig við bókabrennur. Að banna bækur jafngildi því að brenna þær. Þetta kom fram í máli lögmannsins fyrir rétti í Brussel í dag þar sem fjallað var um lögbannskröfuna.

Berenboom segir að frá því fjölmiðlafrelsi varð að veruleika í Belgíu árið 1831 sé afar sjaldgæft að bækur séu bannaðar í landinu.  Berenboom er fyrrum yfirmaður mannréttindasamtaka í Belgíu.

Þetta er ekki í fyrsta skipti sem bókin um Tinna í Kongó veldur usla en bókin var færð úr barnadeildinni í verslunum Border í Bretlandi fyrir þremur árum.