Engir ráðamenn í hlutverki á Grímunni

Sviðslistafólk mun sjálft afhenda tilnefningar til Grímuverðlaunanna, íslensku leiklistarverðlaunanna, sem kynntar verða á morgun og einnig verðlaunin, sem afhent verða 16. júní. Engir ráðamenn þjóðarinnar eða fólk utan listgreinarinnar sjálfrar verða í hlutverki á Grímunni.

Í orðsendingu, sem stjórn Leiklistarsambandsins hefur sent til félagsmanna, segir að ákvörðun um þetta hafi verið tekin af stjórn Leiklistarsambands Íslands í apríl að undangenginni umræðu um hlutverk og tilgang verðlaunanna í fulltrúaráði sambandsins.

Þegar Gríman var fyrst veitt árið 2003 var ákveðið að leita til forsetaembættisins um að þjóðhöfðingi á hverjum tíma yrði verndari verðlaunanna. Hefur Ólafur Ragnar Grímsson, forseti Íslands, síðan jafnan tilkynnt hverjir eru tilefndir til verðlaunanna og einnig veitt heiðursverðlaun Grímunnar á verðlaunahátíðinni.

Jón Atli Jónasson, leikskáld, lýsti því yfir í vikunni að hann neitaði að taka við tilnefningum til Grímunnar Segir hann ástæðuna felast í því að hann neiti að viðurkenna núverandi verndara Grímunnar, Ólaf Ragnar Grímsson, forseta Íslands.

• 3 blogg um fréttina

Bloggað um fréttina

• Axel Jóhann Axelsson: Listamenn afneita Ólafi Ragnari
• Jón Finnbogason: Eðlileg þróun
• Velvakandi: Skilnaður lista, stjórnvalda og atvinnulífs?