Fjórir milljarðar fyrir Manet

Málverk eftir franska listamanninn Edouard Manet var slegið á rúmar 22 milljónir punda (um fjóra milljarða kr.) á uppboði í London. Aldrei hefur jafn há upphæð verið greidd fyrir verk eftir Manet. Gamla metið var sett í New York árið 1989, eða þrír milljarðar kr.

Verkið, sem kallast Manet A La Palette, sýnir sjálfan listamanninn með pípuhatt og með pensil í hönd. Þetta kemur fram á vef breska útvarpsins.

Myndin var máluð á milli 1878 og 1879. Uppboðshúsið Sotheby's segir að þetta sé aðeins önnur af tveimur sjálfsmyndum eftir listamanninn. Þetta sé á meðal stórverka impressjónista.

Meðal annarra verka sem voru seld á uppboðinu var listaverkið Arbres a Colliuoure eftir franska listamanninn Andre Derain. Það fór á 16 milljónir punda. Verkið Odalisques Jouant Aux Dames eftir Henri Matisse var selt á tæpar 12 milljónir punda.

• 1 blogg um fréttina

Bloggað um fréttina

• Hecademus: Listamenn nútímans