The Prodigy áhrifamest

The Prodigy hefur verið valin áhrifamesta hljómsveitin í elektró-geiranum í nýrri könnun sem var gerð í Bretlandi  fyrir danstónlistarhátíðina GlobalGathering.

Íslandsvinirnir í The Prodigy hafa átt smelli á borð við Breathe, Firestarter og No Good (Start the Dance). Frá árinu 1990 hefur sveitin selt yfir 20 milljónir platna á heimsvísu.

Tónlistarhátíðin GlobalGathering, sem er haldin í Warwickshire, er nú tíu ára. Um 50.000 gestir sækja hátíðina árlega. Forsvarsmenn hennar létu framkvæma könnunina til að komast á því hvaða listamenn hafi haft mest áhrif á þróun danstónlistar.

Prodigy hafnaði í fyrsta sæti með 29% atkvæða. Næst á eftir kom franski rafdúettinn Daft Punk og í þriðja sæti var hljómsveitin Faithless.

Meðal annarra á topp 10 voru Fatboy Slim, The Chemical Brothers og Carl Cox.

• 1 blogg um fréttina

Bloggað um fréttina

• Axel Þór Kolbeinsson: Man einhver eftir þessu?