Ætlar að halda upp á sjötugsafmæli Lennons á Íslandi

Yoko Ono, ekkja Johns Lennons, ætlar að halda upp á það í október að John Lennon hefði orðið sjötugur 9. október hefði hann lifað. Kveikt verður á friðarsúlunni í Viðey og Plastic Ono Band mun halda tónleika hér á landi að sögn tónlistartímaritsins Billboard.

Þá mun Ono einnig afhenda LennonOno friðarverðlaunin, sem hún hefur veitt annað hvert ár. Fjórir fá verðlaunin í ár: Josh Fox,  Michael Pollan,   Alice Walker  og Barbara Kowalcyk.

Ekki er ljóst hverjir muni skipa Plastic Ono Band á tónleikunum. Á síðasta ári gaf Yoko Ono út plötu undir þessu nafni og þá var Sean sonur hennar og Lennons meðal annars í sveitinni.

Fyrr á þessu ári komu Eric Clapton, Klaus Voorman og Jim Keltner, sem allir voru í upphaflegri útgáfu Plastic Ono Band, fram ásamt Onu í Brooklyn listasafninu ásamt Bette Midler, Scissor Sisters, Paul Simon og fleirum.

John Lennon var skotinn til bana í New York 8. desember 1980. 

Yoko Ono tók lagið í Hafnarhúsinu í október í fyrra. mbl.is/Ómar

• 1 blogg um fréttina

Bloggað um fréttina

• Axel Jóhann Hallgrímsson: Þarf að segja meira