Mamma Gógó fær góða dóma í Ameríku

Blöð og tímarit vestanhafs keppast nú um að hlaða lofi á íslensku kvikmyndina Mömmu Gógó eftir Friðrik Þór Friðriksson.

Myndin sló í gegn á kvikmyndahátíðinni í Toronto sem lauk um síðustu helgi og hefur hún fengið jákvæða umfjöllun í fjölmiðlum á borð við Eye Weekly Toronto, Moving Pictures og The Huffington Post.

Mamma Gógó fjallar um kvikmyndaleikstjóra sem þráir ekkert heitar en viðurkenningu og ást þjóðar sinnar. Af einhverjum ástæðum er gatan ekki eins greið og hann hugði og eitthvað eru fjármálin líka að flækjast fyrir honum. Til að bæta gráu ofan á svart veikist móðir hans af Alzheimer-sjúkdómnum og þarf að komast á þar til gerða stofnun.