Bílaumferð takmörkuð í Fossvogskirkjugarði

Bílaumferð inn í Fossvogskirkjugarði er takmörkuð á milli kl 9–15 á aðfangadag og aðeins heimil þeim sem framvísa svokölluðu P-merki. Lögregla mun fylgjast með umferð í kringum Fossvogskirkjugarð og Gufuneskirkjugarð á aðfangadag en fjölmargir heimsækja leiði ástvina á aðfangadag.

Ökumönnum er bent á bílastæði við Perluna, Fossvogskirkju, Öskjuhlíðarskóla og í Vesturhlíð. Suðurhlíð verður opin inn á Kringlumýrarbraut í gegnum planið hjá N1 í Fossvogi fyrir þá sem eru að fara til Hafnarfjarðar og/eða Kópavogs, samkvæmt tilkynningu frá lögreglunni.

Aðkoma að Gufuneskirkjugarði verður eingöngu frá Hallsvegi. Starfsfólk Kirkjugarða Reykjavíkurprófastdæma stýrir umferðinni inni í kirkjugarðinum og verður um hringakstur að ræða. Farið er út úr Gufuneskirkjugarði norðanmegin og inn á Borgaveg. Ökumenn er beðnir um að aka Borgaveg í vestur og þaðan um Strandveg. Með þessu móti minnkar álagið á Víkurveg og Hallsveg og greiðir fyrir umferð þeirra sem eru að koma í kirkjugarðinn.

• 2 blogg um fréttina

Bloggað um fréttina

• Guðjón Sigþór Jensson: Takmörkun umferðar
• Árni Davíðsson: Er skynsamlegt að hleypa umferð bíla á eina göngustíginn vestan …