Burt Reynolds var í gær viðstaddur sýningu á kvikmyndinni Smokey and the Bandit frá árinu 1977, í Tampa Theatre í borginni Tampa í Flórída.
Í myndinni leikur Reynolds mikinn ökufant, Bandit, eða Bófa, sem er á æsilegum flótta undan laganna vörðum á Pontiac Firebird Trans Am-bifreið.
Dagblaðið St. Petersburg Times ræddi við Reynolds í vikunni í tilefni af sýningu kvikmyndarinnar. Reynolds segir frá því í viðtalinu að yfirmenn Pontiac hafi lofað því að hann fengi nýjan Trans Am-kagga ævilangt þar sem kvikmyndin hafi aukið mjög sölu á þeim bílum.
Reynolds segist hafa fengið sex bíla frá fyrirtækinu en þegar forstjóri þess hafi dáið hafi Pontiac hætt að senda honum bíla. Hann hafi þá komist að því að með „ævilangt“ hafi Pontic miðað við ævi forstjóra fyrirtækisins.