Vildi koma of seint í eigin jarðarför

Útför leikkonunnar Elizabeth Taylor, í Forrest Lawn grafreitnum skammt frá Los Angeles, hófst 15 mínútum á eftir áætlun í gærkvöldi - að ósk leikkonunnar sjálfrar.

„Hún vildi jafnvel koma of seint í eigin jarðarför," sagði í yfirlýsingu, sem fulltrúi fjölskyldu Taylor las fyrir fréttamenn.

Kista Taylor var lokuð og þakin blómum. Taylor var lögð til hvílu í stóru grafhýsi þar sem söngvarinn Michael Jackson hvílir einnig en þau voru góðir vinir.   

Athöfnin stóð í um klukkustund og voru aðeins nánustu ættingjar og vinir Taylor viðstaddir. Leikarinn Colin Farrell, sem var vinur Taylor, las meðal annars ljóð.  

Michael Wilding, sonur Taylor, Liza dóttir hennar og Tarquin Wilding, sonarsonur leikkonunnar, lásu einnig ljóð og Rhyz Tivey, dóttursonur Taylor, lék Amazing Grace á trompet. 

Gert er ráð fyrir að minningarathöfn um Taylor fari fram innan skamms. 

Útfarargestir komu til athafnarinnar í fimm stórum svörtum bílum.

• 1 blogg um fréttina

Bloggað um fréttina

• Ómar Ragnarsson: Má gjarna vera "flaggaður inn".