Grease-stjarna látin

Bandaríski leikarinn Jeff Conaway lést í morgun eftir að hafa legið í dái á sjúkrahúsi í rúmar tvær vikur í kjölfar ofneyslu lyfja. Conaway er einna þekktastur fyrir hlutverk sitt í kvikmyndunum "Taxi" og "Grease" þar sem hann lék hlutverk Kenickie á móti þeim John Travolta og Olivia Newton-John.

Umboðsmaður Conaway, sem var sextugur þegar hann lést, sagði við fjölmiðla í dag að leikarinn hefði reynt að meðhöndla sjálfan sig með verkjalyfjum vegna versnandi heilsu. Hann fannst meðvitundarlaus á heimili sínu 11. maí síðastliðinn.

Læknar tilkynntu aðstandendum Conaway að engar líkur væru á að hann kæmi úr dáinu og samþykktu þeir í gær að hætt yrði að reyna að halda lífi í honum. Conaway hafði um árabil barist við fíkn í ávanabindandi efni og sagði meðal annars í útvarpsþætti Howard Stern árið 2008 að hann hefði reynt að taka líf sitt 21 sinnum.

„Jeff Conaway var yndislegur og góður maður og við munum sakna hans,“ sagði John Travolta við fjölmiðla í dag í kjölfar þess að tilkynnt var um lát Conaway.

• 1 blogg um fréttina

Bloggað um fréttina

• Ómar Ragnarsson: Ofríki hins "harða húsbónda" verður að linna.