Byrgi fyrir klámhunda

Helstu viðskiptavinir fyrirtækisins Pink Visual, sem sérhæfir sig í erótísku efni, vita hvert þeir eiga að snúa sér komi til heimsendis á næsta ári, líkt og Maja-indíánar hafa lengi spáð. Þeim stendur nefnilega til boða að fá aðgang að neðanjarðarbyrgi þar sem m.a. verður boðið upp á súludans.

Vefur viðskiptastöðvarinnar CNBC segir frá þessu en þar kemur fram að í byrginu verði að finna sérútbúinn frjósemisklefa.

Fylgir ekki sögunni hvaða tækjum hann verði búinn.

Þá verður gerður mannamunur með sérstökum svítum í byrginu fyrir mikilvæga gesti.

Var hugmyndin upphaflega sú að aðeins vinir og vandamenn starfsmanna fyrirtækisins fengju aðgang að byrginu. Var svo ákveðið að bjóða helstu viðskiptavinum þess upp á herlegheitin.

Vart þarf að taka fram, í ljósi frjósemisklefans, að tilgangurinn er að gera viðstöddum kleift að lifa af þær hamfarir sem kunna að dynja á jörðinni á næsta ári, reynist spásögnin fræga á annað borð rétt.

• 1 blogg um fréttina

Bloggað um fréttina

• Axel Jóhann Hallgrímsson: Klámiðnaðurinn, bjargvættur mannkyns