Bítlasamningur á 2,6 milljónir króna

Samningur sem gerður var fyrir hönd Bítlanna um að koma fram á tónleikum í Kaliforníu í Bandaríkjunum 31. ágúst árið 1965 hefur verið seldur á uppboði í Los Angeles fyrr í vikunni fyrir rúmar 23 þúsund dollara eða sem nemur u.þ.b. 2,6 milljónum króna.

Samningurinn er undirritaður af umboðsmanni Bítlanna, Brian Epstein, og þar kemur meðal annars fram að þeir færu sérstaklega fram á að þurfa ekki að spila við aðstæður þar sem áhorfendur væru aðskildir eftir kynþætti.

Fram kemur á fréttavef breska dagblaðsins Daily Telegraph að þetta hafi ekki verið í fyrsta skiptið sem Bítlarnir hafi gert slíka kröfu fyrir því að koma fram á tónleikum í Bandaríkjunum.

Söluverðið á samningnum er langt fyrir ofan það sem uppboðshaldararnir vonuðust eftir en þeir höfðu gert sér vonir um 3-5 þúsund dollara. Ekki hefur verið upplýst hver kaupandinn er.

• 1 blogg um fréttina

Bloggað um fréttina

• Kristinn Snævar Jónsson: Samfélagsmeðvitaðar stjörnur