Milljónir kreppuþjáðra Spánverja standa nú í röðum eftir miðum í jólalottóútdrættinum þar sem hæsti vinningur hefur verið kallaður „Sá feiti,“ eða El Gordo. Vinningarnir eru þeir hæstu í heimi og nema samtals 3,6 milljörðum evra, eða 576 milljörðum íslenskra króna.
Dregið hefur verið úr þeim feita á jólum í næstum tvöhundruð ár en áætlað er að fjórir af hverjum fimm Spánverjum kaupi lottómiða fyrir útdráttinn og eyði að jafnaði 60 evrum í miðana.
Vinningsféð, 3,6 milljarðar evra, nemur um 70% af miðasölutekjum spænska lottósins.
Gert er ráð fyrir að spænsk heimili muni eyða um 560 evrum, eða um 90 þúsund íslenskra króna, í jólin í ár en það er 114 evrum minna en í fyrra.
Stjórnvöld þar í landi hafa tilkynnt um niðurskurð upp á 16,5 milljarða evra á næsta ári.