Fékk rólu í höfuðið í Rómeó og Júlíu

Halldóra Geirharðsdóttir leikkona slasaðist á sýningu Vesturports, Rómeó og Júlíu, í Borgarleikhúsinu í gær. Halldóra fékk rólu í höfuðið og þurfti að fara á slysadeild þar sem saumuð voru 11 spor í höfuðið á henni.

Uppfærsla Vesturports á Rómeó og Júlíu markaði upphafið að glæstu gengi leikhópsins sem ekkert lát hefur verið á síðan verkið var frumsýnt árið 2002. Uppsetning Vesturports er sem kunnugt er mikið sjónarspil þar sem hið heimsfræga leikrit Shakespeares fléttast saman við sirkus og loftfimleika og gengur á ýmsu á sviðinu. Þarf því kannski engan að undra að leikarar séu stundum lemstraðir. 

Á heimasíðu Vesturports kemur fram að þegar Halldóra kom á slysadeild voru þar fyrir tveir aðrir sem höfðu verið áhorfendur á þessari sömu sýningu og voru einnig slasaðir. Ekki kemur þó fram hvernig meiðsl þeirra bar að.

Halldóra mun hinsvegar standa á sviðinu í kvöld í næstu sýningu á Rómeó og Júlíu og virðist því hafa jafnað sig fljótt á höfuðhögginu.

• 2 blogg um fréttina

Bloggað um fréttina

• Sigurður Haraldsson: Já var það.
• Þórdís Bachmann: Farðu vel með þig, Halldóra