Strauss-Kahn er vinsælt yrkisefni

Lítið hefur farið fyrir Dominique Strauss-Kahn, fyrrverandi framkvæmdastjóra Alþjóðagjaldeyrissjóðsins, að undanförnu eftir mikið fjaðrafok í kringum kynlífshneyksli honum tengd. En það er ekki þar með sagt að hann hafi fallið í gleymskunnar dá. Fjöldi bóka, kvikmynda, leikrita og sjónvarpsþátta er væntanlegur þar sem honum verða gerð skil.

Í síðustu viku kom út bókin Chaos Brulant, sem þýða má sem „Brennandi óreiða“ eftir franska rithöfundinn Stephane Zagdanski og þar er fjallað um samskipti Strauss-Kahns við hótelþernu í New York. „Mál hans er holdgervingur nútíma-heimskupara. Hann var einn valdamesti maður heims, en vegna sex mínútna kynlífsathafna féll hann í öskustóna,“ segir Zagdanski.

Áreitni og kynlífsveislur

Hótelþernan Nafissatou Diallo sakaði Strauss-Kahn um að hafa áreitt sig kynferðislega er hún var við störf sín í hótelherbergi hans í maí í fyrra. Fallið var frá kærum, en Diallo höfðaði síðan einkamál þar sem hún fer fram á bætur. Strauss-Kahn höfðaði einnig mál á hendur henni fyrir meiðyrði og ófrægingu. Ekki sér fyrir endann á þeim málarekstri.

Nokkru síðar bárust spurnir af því að Strauss-Kahn hefði tekið þátt í kynlífsveislum sem skipulagðar voru af frönskum kaupsýslumönnum og lögreglu og að þar hefðu vændiskonur tekið þátt. Hann viðurkenndi að hafa verið í slíkum veislum og tekið fullan þátt í því sem þar fór fram, en sagðist ekki hafa vitað hvort einhverjar kvennanna hefðu fengið greitt fyrir.

Í gær var síðan staðfest að eiginkona hans, sjónvarpskonan Anne Sinclair, hefði sagt skilið við hann, en hún hafði staðið við hlið bónda síns fram að því. Hún staðfesti skilnað þeirra í blaðaviðtali við dagblaðið Le Parisien. Sinclair er nú ritstjóri frönsku útgáfunnar af The Huffington Post, en hún er einnig afar auðug.

Leikrit um kynóðan karl

Þetta var safaríkari söguþráður en færustu handritshöfundar og rithöfundar hefðu getað spunnið upp. Bókin Night Watch, sem er byggð á atburðum sem tengjast Strauss-Kahns, sat um tíma á metsölulista The New York Times og í fyrra var framleiddur þáttur í seríunni Law and Order: Special Victims Unit þar sem byggt var á atburðum sem tengjast honum.

Þá hefur verið framleidd djörf mynd um málið og leikritið L´Affaire, þar sem fjallað er um kynóðan karl sem nær miklum metorðum og fellur síðan af stalli var nýlega frumsýnt í leikhúsi í París.

Í sumar hófst svo framleiðsla á ávaxtadrykk sem ber heitið DSK, sem er fangamark Strauss-Kahns. Drykkurinn er sagður innihalda efni sem örvar fólk til ásta.

Félagslega útskúfaður af mörgum

Einnig er von á nokkrum ævisögum um Strauss-Kahn, allar eru þær skrifaðar án samvinnu við viðfangsefnið. Að auki er von á kvikmynd í leikstjórn Abels Ferrara þar sem fjallað er um hneykslismál tengd Strauss-Kahn og verður hann leikinn af franska leikaranum Gerard Depardieu.

Flestir af gömlum vinum og viðhlæjendum Strauss-Kahns hafa snúið við honum bakinu. Það á einkum við um flokksfélaga hans í Sósíalistaflokknum, en hann var eitt sinn sagður næsta forsetaefni flokksins.

En rithöfundurinn Zagdanski hefur trú á að hann eigi eftir að rísa aftur til metorða. „Ef við lendum í verulegum efnahagsvandræðum og vitum ekki hver gæti leitt okkur út úr þeim, þá gæti Strauss-Kahn verið maðurinn, jafnvel gæti hann orðið forsetaframbjóðandi. Hann hefur vissulega átt við nokkur vandamál að stríða varðandi kynhvötina. En við höfum séð það verra.“