Íslenskur dansari gerir það gott

Bryndís Ragna Brynjólfsdóttir var á dögunum valin í hóp 100 bestu dansara í heimi á dansárinu 2011-2012 af tímaritinu Dance Europe. Ár hvert tekur tímaritið saman lista yfir framúrskarandi dansara byggðan á tilnefningum dómnefndar, en enginn Íslendingur hefur komist á listann svo vitað sé til.

„Auðvitað er það mikil virðing og viðurkenning að það sé tekið eftir manni. Þetta eru gagnrýnendur um allan heim sem gefa upp lista yfir þá tíu dansara sem þeim finnst eiga þann heiður skilinn að komast á listann,“ segir Bryndís Ragna í samtali við Sunnudagsblað Morgunblaðsins.