„Þegar þú kastar upp 30-40 sinnum á hverjum degi og þarft að leggjast inn á sjúkrahús, þá erum við ekki að tala um hefðbundna morgunógleði,“ segir Rachel Treagust, 28 ára gömul bresk kona. Hún hefur gengið með þrjú börn og á öllum meðgöngunum þjáðst af hyperemesis gravidarum, sjúkdómi sem nú hrjáir Katrínu, hertogaynju af Cambridge sem gengur með sitt fyrsta barn.

Á íslensku hefur þetta verið kallað sjúkleg morgunógleði eða sjúkleg uppköst.

Rachel sagði í samtali við AFP-fréttastofuna að sjúkdómurinn hefði lýst sér þannig að hún hefði verið rúmliggjandi meirihluta meðgöngunnar og hefði varla getað komið matarbita niður. Afleiðingarnar af því geta verið ýmiskonar; mikil þreyta, svimi og einbeitingarskortur og sumar kvennanna finna fyrir einkennum þunglyndis.

Hefðbundin morgunógleði hrjáir um 30% þungaðra kvenna í Bretlandi, en einungis um 0,5% fá sjúklega morgunógleði. 

Samkvæmt breskum heilbrigðisyfirvöldum þarf stundum að meðhöndla ástandið með vökvagjöf í æð. Þessi sjúkdómur hefur fengið fremur takmarkaða athygli, allt þar til greint var frá því að Katrín hefði verið lögð inn á sjúkrahús vegna hans.