Hótaði að aflýsa vegna reykinga

Lýðum hefur löngum verið ljóst að Madonna er mikið fyrir heilsurækt og hollustu. Á dögunum hótaði hún m.a.s. að aflýsa tónleikum nema tónleikagestir dræpu umsvifalaust í sígarettum sínum.

Poppdrottningin var í Síle þar sem rignt hafði eins og hellt væri úr fötu fyrir tónleikana. Átti atvikið sér stað þegar söngonan hætti sér út á sviðið til að prófa hljóðbúnaðinn en töluverður fjöldi gesta hafði mætt snemma til að berja hana augum.

„Fólk er að reykja hérna nákvæmlega núna. Reykingar eru bannaðar hérna. Ef þið ætlið að reykja verður ekkert af tónleikunum,“ hvæsti hún í míkrafóninn þegar hún sá fjölda fólks púandi sígarettur fyrir framan sviðið.

„Ég er ekki að grínast, ég get ekki sungið ef þið reykið hérna. Skilið? Ef ykkur er ekki sama um mig þá reykið þið ekki,“ sagði söngkonan og var allra síst hlátur í huga.

Hvort liðið drap allt í fylgir ekki sögunni samkvæmt tónlistarvefnum Rolling Stone. Tónleikarnir fóru í öllu falli fram eins og lagt var upp með.

• 1 blogg um fréttina

Bloggað um fréttina

• Ómar Ragnarsson: Spurning um nauðung.