Þráinn íhugar nýja Lífs-mynd

„Ég hef lengi látið mig dreyma um það að fara af stað aftur með Eggerti og Kalla og gera mynd um þessa lukkuriddara - athuga hvort þeir eru jafn áhyggjulausir af lífinu og framtíðinni 25 árum síðar,“ segir Þráinn Bertelsson, þingmaður VG, um þann draum sinn að gera framhald af myndunum Nýtt-líf, Dala-líf og Löggu-líf.

Tilefnið var sú spurning hvað hann hugsi sér að gera að afloknum þingstörfum. 

En Þráinn sækist ekki eftir endurkjöri fyrir VG.

Lífs-myndirnar skörtuðu þeim Karli Ágústi Úlfssyni og Eggerti Þorleifssyni í aðalhlutverkum en auk þess fór Sigurður Sigurjónsson með stór hlutverk, m.a. sem fjármálamaður sem finnur sjálfan sig í fjósinu í Dala-lífi. Þá lék hann í Löggu-lífi.

„Þeir eiga kannski sjálfir uppkominn börn og spurning hvort þeir mæla með þessum lífsstíl sem þeir hafa haft. Ég er voða forvitinn um það,“ segir Þráinn um leikarana, eða réttara sagt persónurnar þrjár ódauðlegu.

„Ekkert sérstaklega montinn af því“

Þráinn segir Sigurjón afbragðsleikara.

„Siggi er alveg ómissandi. Hann hefur leikið bæði milljónamæringa og róna.“

- Og peningamanninn sem elskar fjósalyktina?

„Já. Hann kom með frasann „I love it“ inn í íslenskt talmál og ég er ekkert sérstaklega montinn af því. Hann lék líka alveg prýðilega skynsaman og ábyrgan róna eða útigangsmann í Löggu-lífi. Hann prýðir allt sem hann kemur nálægt hann Siggi.“

Skriftir koma líka til greina

Þráinn er ekki maður einhamur. Hann dreymir þannig líka um ritstörf.

„Ég ætla að gá hvort það er eitthvað eftir af mér og ætla að athuga hvort ég geti skrifað eitthvað sem hugsanlega einhverjir aðrir en ég gætu haft áhuga á, og ef ekki þá skrifa ég bara eitthvað handa sjálfum mér.“ 

• 1 blogg um fréttina

Bloggað um fréttina

• Haraldur Haraldsson: Þráinn íhugar nýja Lífs-mynd//Þar er minn maður á heimavelli blessaður …