Tökur á fjórðu þáttaröð sjónvarpsþáttanna Game of Thrones hefjast á Íslandi í vikunni. Þættirnir verða m.a. teknir upp á Þingvöllum, í Þjórsárdal og á Hengilssvæðinu samkvæmt heimildum mbl.is. Síðustu tvær seríur hafa einnig verið teknar hér á landi að hluta, báðar að vetrarlagi en að þessu sinni verður Ísland í sumarskrúðanum. 

Meðal leikara í þáttunum er Kit Harrington og var hann staddur á Comic-Con ráðstefnunni í Kaliforníu á föstudag. Þar sat hann fyrir svörum um Game of Thrones og grínaðist með að hann tæki aðeins að sér verkefni sem tekin væru upp við erfiðar aðstæður, hvort sem væri nístingskuldi á Íslandi eða að svamla í vatni klukkustundum saman líkt og hann þurfti að gera við tökur ævintýramyndarinnar Seventh Son.