Lokaatburður Iceland Noir, alþjóðlegu glæpasagnahátíðarinnar í Reykjavík, Notalegt glæpakvöld, fer fram í Norræna húsinu í kvöld.
Þar lesa átta höfundar upp úr verkum sínum á ensku og spjalla við áhorfendur, auk þess sem veittir verða bókavinningar fyrir bestu spurningarnar úr sal.
Sérstakir erlendir gestir eru rithöfundarnir James Oswald, Matt Hilton, Michael Ridpath, Quentin Bates og Susan Moody, en auk þess koma fram íslensku höfundarnir Ragnar Jónasson, Viktor Arnar Ingólfsson og Yrsa Sigurðardóttir.
Um þrjátíu rithöfundar og þýðendur taka þátt í alþjóðlegu glæpasagnahátíðinni Iceland Noir, þar af kemur rúmlega helmingur frá útlöndum. Iceland Noir er fyrsta alþjóðlega glæpasagnahátíðin á Íslandi.