Áður óbirtar myndir af líki Cobains

Lögreglan í Seattle skoðar nú nýjar myndir af vettvangi þar sem Kurt Cobain, söngvari Nirvana, fannst látinn í apríl árið 1994. Cobain er talinn hafa svipt sig lífi með skotvopni eftir að hafa innbyrt lífshættulegan skammt af heróíni. 

Í tilefni þess að 20 ár eru liðin frá því að Cobain lést ákvað lögregluþjónn að skoða aftur gögn málsins og komst hann þar yfir gamla filmu sem ekki hafði áður verið framkölluð. Talið er að myndirnar séu enn ítarlegri en hinar myndirnar sem lögreglan tók á vettvangi og geti þar með varpað enn betra ljósi á málsatvik. 

Nokkrar myndir hafa verið gerðar opinberar af lögreglunni en talsmaður lögreglunnar segir að myndir af líki Cobains verði eðli máls samkvæmt ekki gerðar opinberar. Talsmaðurinn sagði enn fremur að vinsældir Cobains leiði til þess að lögreglunni berast vikulega fjölda fyrirspurna um hvort ekki sé eðlilegt að rannsókn á dauðdaga Cobains verði hafin að nýju.