18 lönd á einum sólarhring

Þrír vinir frá Noregi slógu í kvöld heimsmet í að heimsækja flest lönd á einum sólarhring. Gamla metið var 17 lönd, en þegar þeir félagar óku yfir landamærin til Sviss í kvöld höfðu þeir heimsótt 18. 

Er þetta önnur tilraun þeirra til þess að slá metið en í sumar tókst þeim aðeins að jafna gamla metið. Eftir að hafa skipulagt sig enn betur tókst þeim að slá metið nú í dag. Með í för var meðal annars pissuflaska, ef þörf myndi krefjast, enda máttu þeir engan tíma missa. 

Félagarnir þrír, þeir Gunnar Garfors, Tay-young Pak og Øystein Djupvik eru afar ferðavanir og er Garfors til að mynda eini Norðmaðurinn sem hefur náð þeim merka áfanga að heimsækja öll lönd heims. 

Löndin 18 sem félagarnir heimsóttu eru: Grikkland, Búlgaría, Makedónía, Kosovó, Króatía, Bosnía Hersegovinía, Austurríki, Ungverjaland, Tékkland, Þýskaland, Holland, Belgía, Lúxemborg, Frakkland og Sviss. 

Þegar þessi frétt var skrifuð var ferðalagi þeirra ekki enn lokið, en þeir hafa tímann til klukkan 22 í kvöld að íslenskum tíma til að bæta við löndum á listann. 

Sjá umfjöllun Verdens gang um för vinahópsins. 

• Blogga um frétt