Björk vill aðra búsáhaldabyltingu

Björk Guðmundsdóttir söngkona vonar að efnt verði til nýrrar búsáhaldabyltingar til að koma núverandi ríkisstjórn frá völdum. Björk lýsir þessu yfir í ítarlegu viðtali við breska dagblaðið Guardian en þar lýsir hún yfir megnri óánægju með núverandi ríkisstjórn. 

Björk rifjar upp efnahagshrunið 2008 og hvernig það hafi alið af sér búsáhaldabyltinguna. Svo segir hún orðrétt í lauslegri íslenskri þýðingu:

„Við sendum nokkra stjórnmálamenn í fangelsi og fólk stóð fyrir utan þinghúsið og barði potta og pönnur og rak ríkisstjórnina frá völdum. Sem var gott. En síðan varði vinstristjórnin fjórum árum í það eina verk að hreinsa upp eftir hrunið og mikið af fólki tapaði samt peningum og missti heimili sín. Síðan komst hægrisinnaði bændaflokkurinn til valda vegna þess að hann lofaði að þurrka út skuldir allra, sem hann getur auðvitað ekki.

Þetta er vitfirrt ríkisstjórn. Allt sem hún gerir er hræðilega rangt. Hlutirnir eru aftur að verða eins og þeir voru fyrir bankahrunið nema hvað þeir eru fimmfalt verri núna. Eftir allar breytingarnar sem vinstristjórnin gerði - og ég held því ekki fram í augnablik að ég sé til vinstri, ég álít mig hvorki vinstri eða hægri manneskju - hefur þeim á fimm mínútum tekist að snúa hlutunum til fyrri vegar og einkavætt allt. Svo við höfum vonað að það yrði önnur bylting til að koma þeim frá völdum,“ sagði Björk um stjórnmálaástandið á Íslandi.

Viðtalið er á ensku og það má lesa hér.

• 4 blogg um fréttina

Bloggað um fréttina

• Kristin stjórnmálasamtök: Björk Guðmundsdóttir, slepptu hendinni af íslenzkri pólitík
• Júlíus Már Baldursson: En afhverju býr hún ekki sjálf á Íslandi?
• Jens Guð: Gerum út á íslenskar heimsstjörnur
• Valdimar Samúelsson: Björk er málaliði hjá ESB eða er hún að vita …