Flaug Curtis-Jenny níræður

Dagfinnur Stefánsson flugstjóri hélt upp á 90 ára afmæli sitt, sem er á morgun, með því að ferðast fyrr í vikunni 3.000 mílur vestur til Bowling Green í Kentucky í Bandaríkjunum til að fljúga þar um það bil hundrað ára gamalli opinni tvíþekju af gerðinni Curtis-Jenny.

Curtis-Jenny eru einhverjar frægustu flugvélar heims. Þær voru notaðar í fyrri heimsstyrjöldinni og þeim flugu kappar eins og Charles Lindbergh og Amelia Earhart þegar þau lærðu til flugs.

„Mér þykir mjög gaman að hafa látið verða af þessu. Ég var búinn að hugsa um þetta í mörg ár,“ segir Dagfinnur í samtali í Morgunblaðinu í dag. Hann er ern og hress og fer sjálfur allra sinna ferða, gangandi, akandi eða fljúgandi.