Fagnaði 105 ára afmælinu með föngulegum slökkviliðsmönnum

Hin eldhressa Ivena Smailes hélt upp á 105 ára afmælið sitt á dögunum. Smailes er sko aldeilis ekki dauð úr öllum æðum, en þegar hún var spurð að því hvað hún vildi fá í afmælisgjöf sagðist hún vilja fagna áfanganum umkringd föngulegum slökkviliðsmönnum.

Smailes fékk ósk sína uppfyllta, en hún hélt upp á afmælið umkringd 40 vinum og ættingjum. Þar fyrir utan var fimm fjallmyndarlegum slökkviliðsmönnum boðið til veislunnar.

„Ivy veitir okkur krefjandi verkefni á hverju ári, en í þetta sinn bað hún um slökkviliðsmenn,“ sagði starfsmaður hjúkrunarheimilisins sem Smailes býr á í viðtali við ABC.

„Við fengum slökkviliðsmenn til að koma inn um glugga á þriðju hæð, en þeir voru meira en tilbúnir að hjálpa.“

Smailes var sjálf kampakát með veisluna sem hún sagði algerlega frábæra. Hún er þegar farin að huga að 106 ára afmælinu, en á næsta ári segist hún ætla að bjóða Harry Bretaprins til veislu.

Eins og sjá má var ákaflega glatt á hjalla.

• 1 blogg um fréttina

Bloggað um fréttina

• Geir Magnússon: óþarfa villur