Veröld/Fólk | AFP | 9.1.2017 | 7:10 | Uppfært 8:08

Lét Trump heyra það

Leikkonan Meryl Streep. AFP

Bandaríska leikkonan Meryl Streep gagnrýndi Donald Trump, sem tekur við embætti forseta Bandaríkjanna eftir 11 daga, í ræðu sinni á Golden Globe-hátíðinni í gærkvöldi.

Streep, sem hefur fengið Óskarsverðlaun í þrígang fyrir leik sinn, var heiðruð á hátíðinni fyrir ævistarf sitt í þágu kvikmynda. Verðlaunin eru veitt í nafni Cecil B DeMille af samtökum erlendra blaðamanna í Hollywood.

Leikkonan, sem er 67 ára gömul, háði harða baráttu við tilfinningarnar þegar hún tók við verðlaununum. Hún spurði áhorfendur í salnum um hver þau væru sem væru þarna. Hún og öll þau væru sá hópur sem mest væri níddur í bandarísku samfélagi í dag. Hollywood, útlendingar og fjölmiðlar. „En hver erum við? Eins og þið vitið, hvað er Hollywood eiginlega? Þetta er bara hópur fólks frá öðrum stöðum.“

Hún ræddi um að það væru innan við tvær vikur þangað til Trump yrði settur í embætti forseta Bandaríkjanna. Maður sem níddi Mexíkóa og vildi banna innflytjendur sem væru íslams-trúar.

Hollywood byggi á útlendingum og þeim sem eru öðruvísi. Ef þeim verður vísað á brott verður ekkert annað að horfa á en ruðning og MMA-bardagalistir sem ekki eru listir, sagði Streep og hélt aftur tárunum.

Meryl Streep er talin ein besta leikkona samtímans en hún hefur meðal annars unnið til átta Golden Globe-verðlauna á ferlinum og hlotið 29 tilnefningar.

Hún nefndi hins vegar Trump aldrei á nafn en nánast allri ræðunni var beint að honum. Hún talaði meðal annars um þá hvöt að niðra aðra, einkum í opinberri orðræðu af hálfu valdamikils fólks, sem hafi áhrif á líf allra. Vanvirðing bjóði vanvirðingu heim líkt og ofbeldi hvetur til ofbeldis.

Að sögn leikkonunnar varð hún orðlaus á meðan kosningabaráttunni stóð þegar frambjóðandi repúblikana gerði lítið úr fötluðum blaðamanni sem starfar fyrir bandaríska dagblaðið New York Times.

La La Land hlaut sjö verðlaun

Trump hermdi eftir blaðamanninum Serge Kovaleski og var með óviðeigandi látbragð á fjöldafundi í Suður-Karólínu í nóvember. Trump notaði grein, sem Kovaleski skrifaði árið 2001, til að styðja við mjög umdeildar fullyrðingar um að mörg þúsund múslimar hafi fagnað í New Jersey í kjölfar hryðjuverkaárásanna á Bandaríkin 11. september 2001.

Trump sagði á að Kovaleski væri ágætur blaðamaður en sagði að hann myndi ekki eftir að hafa haldið þessu fram.

„Aumingja náunginn, þið verðið að sjá hann,“ sagði Trump svo. Svo fór hann að veifa höndunum undarlega og var augljóslega að herma eftir blaðamanninum, sem er með vöðva- og taugasjúkdóm sem hefur áhrif á hreyfingar hans. Sérstaklega hefur þetta áhrif á hægri handlegg og hönd hans.

„Uuu, ég man ekki hvað ég sagði. Uuu ég man ekki. Hann segir bara: „Ég man ekkert. Kannski sagði ég þetta,“,“ sagði Trump á meðan hann sveiflaði höndunum, samkvæmt fréttum frá þessu tíma.