Blindrahundur hlaut tvenn verðlaun

20 íslenskar heimildarmyndir voru frumsýndar á Skjaldborg – hátíð íslenskra heimildarmynda, nýliðna helgi á Patreksfirði og einnig voru kynnt átta verk í vinnslu. Dómnefndarverðlaun voru veitt í fyrsta sinn á hátíðinni til viðbótar við áhorfendaverðlaunin, Einarinn, og svo fór að sama heimildarmynd, Blindrahundur eftir Kristján Loðmfjörð, hlaut hvor tveggja verðlaun hátíðarinnar en í myndinni er fjallað um myndlistarmanninn Birgi Andrésson sem lést árið 2007, aðeins 52 ára. Birgir ólst upp við sérstakar aðstæður á Blindraheimilinu við Hamrahlíð þar sem foreldrar hans voru blindir og varð sú reynsla honum innblástur við listsköpun á fullorðinsárum. Dómnefnd var sammála um að myndin hefði verið unnin af næmi og öryggi og gerð í anda viðfangsefnisins. Ennfremur var það mat hennar að samspil allra listrænna þátta verksins hefði heppnast mjög vel. Einnig þótti dómnefnd ástæða til þess að minnast sérstaklega á myndina Lesbos eftir Lúðvík Pál Lúðvíksson en hann ferðaðist til eyjarinnar Lesbos og kynnti sér neyð fólks á flótta.