Stálu ósýndu efni úr Game of Thrones

Forsvarsmenn HBO sjónvarpsstöðvarinnar greindu frá því í dag að tölvuárás hefði verið gerð á fyrirtækið. Segja bandarískir fjölmiðlar ósýnt efni og handrit vinsælla þátta á borð við Game of Thrones vera meðal þess sem var stolið.

Í yfirlýsingu frá HBO, sem er í eigu Time Warner samsteypunnar, segir að „net atvik“ hafi stefnt einkaréttarvörðu efni í hættu“ og því hafi fyrirtækið haft samband við lögreglu og netöryggisfyrirtæki.

„Innrás þessa eðlis hefur augljóslega áhrif, veldur óþægindum og kemur okkur öllum úr jafnvægi,“ sagði Richard Plepler forstjóri HBO, í yfirlýsingu til starfsmanna.

HBO hefur ekki greint frá því hvaða þætti tölvuþrjótarnir hefðu komist yfir, en nokkrir fjölmiðlar fengu sendan tölvupóst frá óþekktu netfangi þar sem sendandinn stærði sig af þjófnaðinum og sagðist m.a. munu setja áður ósýnt efni úr Game of Thrones þáttunum á netið.

• Blogga um frétt