Tónleikum Future aflýst

Tónleikum rapparans Future, sem fara áttu fram í Laugardalshöll næsta sunnudag, hefur verið aflýst. Þetta staðfestir Ísleifur Þórhallsson, tónleikahaldari hjá Senu, í samtali við mbl.is. 

Miðahafar munu fá endurgreitt á næstu dögum. 

Ísleifur segir margt spila inn í ákvörðunina en viðurkennir að miðasalan hefði mátt ganga betur. „Ef miðasalan hefði verið frábær hefðum við líklega haldið tónleikana.“ Um sé að ræða sameiginlega ákvörðun Senu og umboðsmanna rapparans.

Frétt af mbl.is

Future heldur tónleika á Íslandi

Future er einn vinsælasti rappari heims um þessar mundir. Í febrúar gaf hann út tvær plötur, HNDRXX og Future, og vermdu þær báðar efsta sæti bandaríska Billboard-listans um stund.

Hann er nú á tónleikaferðalagi um Vesturlönd og hugðist troða upp á Íslandi milli þess sem hann spilar í Bandaríkjunum og Evrópu. Til stóð að einvalalið rappara hitaði upp fyrir kappann: Aron Can, Emmsjé Gauti, JóiPé og Króli, en ljóst er að ekkert verður af því.

• Blogga um frétt