Sagðist ekki vera hálfviti fyrir dómi

Breski tónlistarmaðurinn Ed Sheeran kom fyrir dóm í New York-borg í gær, þriðjudag, þar sem hann var sakaður um lagastuld í lagi sínu Thinking Out Loud.

Erfingjar meðhöfundar lags Marvins Gayes, Let's Get it On, halda því fram að Sheeran, Warner Music Group og Sony Music Publishing skuldi þeim peninga fyrir að hafa stolið laginu. 

Sheeran neitaði því alfarið að hafa stolið laginu. „Ef ég hefði gert það sem þú ert að saka mig um að hafa gert, þá væri ég algjör hálfviti að standa á sviði fyrir framan 20 þúsund manns og gera það,“ sagði tónlistarmaðurinn.

Ekki leyfilegt að dansa í réttarsalnum

Réttarhöldin hófust í gær, þriðjudag, og varaði dómarinn sjö manna kviðdóm við því að þrátt fyrir að tónlist yrði leikin fyrir rétti væri ekki leyfilegt að dansa. Gert er ráð fyrir að réttarhöldin muni standa í að minnsta kosti viku að því er fram kemur á BBC. 

Þetta er ekki í fyrsta sinn sem Sheeran kemur fyrir dóm vegna ásakana um lagastuld, en rúmt ár er liðið frá réttarhöldum í Lundúnum vegna lagsins Shape of You.

Frétt af mbl.is

Segist ekki hafa stolið laginu

• 1 blogg um fréttina

Bloggað um fréttina

• Wilhelm Emilsson: Lög og réttur