Britney Spears hefur birt yfirlýsingu á Instagram eftir að öryggisvörður körfuboltamannsins Victor Wembanyama sló hana utan undir, að því er fjölmiðlar vestan hafs greindu frá í gær.
Hugðist hún óska Wembanyama til hamingju um gott gengi að undanförnu þegar öryggisvörður körfuboltamannsins, sem leikur fyrir San Antonio Spurs í NBA-deildinni, sló hana utan undir.
Wembanyama hefur lýst því yfir að Britney hafi gripið í hann og því hafi öryggisverðir þurft að bregðast við, að því er Daily Mail greinir frá.
Í yfirlýsingu á Instagram útskýrir Britney að hún hafi séð til kappans á hóteli í Vegas, því næst farið út að borða og séð hann aftur. Þá hafi hún pikkað í öxl kappans og fengið hörð viðbrögð frá öryggisgæslu Wembanyama.
„Áföll eru eitthvað sem ég kannast vel við og ég hef fengið að upplifa hóg af þeim. Ég var ekki að búast við atburðarásinni sem átti sér stað í gærkvöld,“ skrifaði hún í færslu á Instagram í gær.